#3 Citadelle da fà
Salute à tutti ! Eccu u vostru terzu numeru di e digressione. Sta settimana n’avemu da amparà di più annant’à e citadelle postu chì si festighjava i 600 anni di a citadella di Corti a settimana scorsa1. Si sò tenute à capu di st’evenimentu parechje cunferenze e festività pè marcà issu mumentu tantu particulare. Ùn hè micca ogni ghjornu ch’ellu si festighjeghja i so 6 seculi d’esistenza !
Citadella di longa storia
A citadella di Corti hà dunque cumminciatu a so custruzzione in lu 1419. Ghjè Vincentellu d’Istria, conte è vice-rè di Corsica sott’à a curona d’Aragone (u rè Alphonse V d’Aragone) chì face custruì l’edifiziu. Frà 1421 è 1434, regna in maestru annant’à a Corsica è cumbatte i Genuvesi. Hè dunque difatti a sola citadella di u centru Corsica (poh, chì putenza !)
Hè finita a custruzzione di a famosa di Corti (“le nid d’aigle”) in lu 1769, ghjustu dopu a fine di a campagna militare di Louis XV (Luiggi u piombu per l’intimi). Ghjè ghjustapuntu sott’à quessa ch’un edifiziu eresu ad u XVIesimu seculu purterà u guvernamentu di Paoli : u Palazzu Naziunale.
Ghjè più tardi ind’è l’anni 60 chì si stabilisce a leggione strangera inde issa citadella. Serà tandu eresa a “Caserne Serrurier” in l’incinta di u munumentu è si steranu inde u rughjone curtinese fin’à u principiu di l’anni 80, dopu à a morte di dui pastori buzinchi tumbati da un leggiunariu.
Più tardi, à a fin’di l’anni 90, si stabilirà u “Museu di a Corsica” (sempre apertu oghje). Un museu d’antrupulugia2 è di storia cù una spusizione permanente (sopra tuttu annant’à tradizione di u centru Corsica, cume i vestiti di e cunfraterne curtinese) è un altra tempuraria chì scambia duie volte à l’annu.
Un’eredità Genuvese
A citadella di Corti ùn hè micca a prima chì hè stata custrutta (aè ! Era troppu simplice l’affare !). A prima di tutte hè quella di Bunifaziu à a fine di u XIIesimu seculu. E prime furtificazione sò tandu state alzate da i Pisani. Ma ghjè in 1187 chì i Genuvesi cumandati da Falcone Castello piglianu a cità è finiscenu e furtificazione. Iss’ultimi perdenu u cuntrollu di a cità in lu 1195, nanzu di ripigliallu pocu tempu dopu (ùn sanu mancu s’elli collanu o s’elli fallanu !)
Bunifaziu hè forse a furtificazione a più impurtante di l’isula à l’epica per rapportu à a so geugraffia. Difatti, a cità hà a vista annant’à tutte e bocche di u listessu nome è si vedenu i battelli di cummerciu chì passanu da tirreniu3 à mediterraniu. À spessu per i Genuvesi, dui passeghji maritimi sò impurtantissimi per contrullà u cummerciu in mediterraniu uccidentale : E bocche di Bunifaziu (l’aghju dettu nanzu, ùn leghjite micca o chè !?), è u canale di Corsica (canale maritimu frà u Capicorsu è l’archipelagu4 Tuscanu).
Seguiterà subitu dopu à Bunifaziu, a citadella di Calvi chì a cità hè digià occupata da i genuvesi dipoi 1161. Calvi s’adopra sopratuttu per u controlu di e coste di u nordu di a Corsica, chì e rilazione frà Genuva è u Capicorsu, sò tandu impurtante. Si cunfedera5 – Calvi – tandu à Genuva in lu 1278 cù a famosa divizia : “Civitas Calvi semper fidelis” (“Cità di Calvi sempre fidela”, per i prufani).
Genuva à a cunquista di a Corsica
A battaglia di a Meloria in lu 1284 face passà una volta per tutte l’aministrazione di a Corsica sott’à a cumuna di Genuva (ancu s’è i Pisani a rinvidicheghjanu sempre più tardi, ancu sott’à u ducatu Tuscanu. Oh chì bellu scempiu…)
Calvi, ella, ancu sempre fidela à a so cumuna, hè stata occupata in lu 1420 da l’armate di… *rotuleghjanu i tamburini* u nostru caru Vincentellu d’Istria (bellu sicuru, sott’à l’ordini di Alphonse V d’Aragone)! Ghjè tandu in lu 1453, sott’à prutezzione di l’Uffiziu di San Ghjorghju chì s’alzanu e furtificazione chì si ponu sempre vede oghje in Calvi. Tandu ùn hè più una simplice piazza furtificata, ma una bella citadella cù alte muraglie.
Tandu d’altre furtificazione esistenu in Corsica : Bastia (1380), Aiacciu (1492) è infine Purtivechju (1542). Isse citadelle sò difatti edifizi aduprati cume lochi di vita da i Genuvesi è li permettenu di tene u so putere in Corsica. À spessu, “Terra Nova” in Bastia (locu induve si trova a citadella, seguitate appena !) hè sempre chjamata oghje “Palazzu di i Guvernatori”, chì era quì chì si risentia u putere di a cumuna di Genuva cù u so guvernu in Corsica.
Oghje, e citadelle di Calvi, Bastia, Bunifaziu è Purtivechju sò sempre lochi di scuperta culturale è di scambii. Solu a citadella d’Aiacciu, cù a presenza militare ch’hà cuntinuvatu fin’à st’ultimi anni, ùn hà micca seguitatu u destinu di e so surelle (ùn ponu mai fà cume l’altri st’Aiaccini !)
Eccu per issu terzu numeru di e digressione di u Lurianacciu. Sughjettu assai carricatu di storia per st’edizione a sò (à mumenti o zitè, ùn possu micca bè face a mio cronica sinnò !), ma assai incumplettu mi ne scusu. Hè per quessa chì per più di precizione, vi cunsigliu di leghje Chronique de la Corse di Giovanni della Grossa, sturianu isulanu chì face un riassuntu di a storia Corsa fin’à 1546. O per una lettura (forse di più scientifica), duie opere di Jean-André Cancellieri : Bonifacio au Moyen-âge è Ajaccio 1492.
Noi ci ritruvemu tandu subitu per u picculu lessicu, ed a settimana prussima per un novu numeru di e digressione ! Scialatevilla !
Lessicu :
- 1 : Semaine dernière/passée
- 2 : Anthropologie
- 3 : Mer Tyrrhénienne
- 4 : Archipel
- 5 : se confédère (avec)
