U 173esimu : I zitelli abbandunati

#2 U 173^esimu : I zitelli abbandunati

Per issu secondu numeru di e digressione, mi sò ramentatu chì Luni era u 11 di nuvembre, ghjornu cunnisciutu inde u mondu sanu cume l’armistiziu di u 1918 chì hà marcatu a fine di i cumbatti di u primu conflittu mondiale. In Corsica, hà un significatu particulare sta guerra è l’averete capita (o innò !) iss’articulu cunsacratu à u 173^esimu regimente d’infanteria : I zitelli.

Prima di tuttu ci vole à sapè chì stu regimente face a so apparizione in lu 1794 (Trippa ! Pocu vechju !) Hè digià à l’epica, un regimente cumpostu di Corsi à forte carratteru isulanu¹. Poche sò l’infurmazione annant’à issa perioda for’di e so date di creazione (fideghjate più insù) è di dissuluzione in lu 1796.

Un primu cunflittu mondiale

Hè rifurmatu – u regimente – in lu 1913 cù u 173^esimu regimente d’infanteria alpinu, torna vignale, cumpostu di Corsi è sempre cù un forte carratteru isulanu. Chì dice 1913, dice dinù veghja di a Prima Guerra mondiale, chjamata dinù a “Grande Guerre” o “La der des der” talmente u so ricordu fù forte ed indelibile inde a mente di i so cumbattanti. Cunniscimu sfurtunamente a seguita…

Per fà un picculu riassuntu, hè statu assassinatu l’archiduca² eretu d’Austria-Ungaria Francesco Ferdinando incù a so moglia u 28 di Ghjugnu 1914 in Sarajevo. Iss’azzione pruvocherà u cunsigliu di ministri in Vienna u 7 di Lugliu à sceglie a guerra. U 28 di Lugliu l’Austria-Ungaria dichjara a guerra à a Serbia. À partesi da quì sì mubilizeghjanu l’armate Austro-Ungarese è Russie u 30 di Lugliu è e Germane è Francese u 1^mu d’Aostu.

A storia di u 173^esimu cummencia cù sta mubilisazione. Versu 52000 mubilizati è 2 à 3000 vulinteri sò partuti in guerra, ancu i zitelli di 15 anni, l’anziani è i babbi di famiglia di 6 figlioli è più per via di a predispusizione speciale à a Corsica ed à u Senegalu. Più di 3500 seranu primi mandati in u 173^esimu d’infanteria è a maiò parte anu menu di 20 anni. Hè da quì ch’ellu tene u so cugnome³ : I Zitelli.

Senza entre in i ditaglii, chì libri è siti annant’à u sughjettu sò abbastanza numerosi per discrive tuttu u storicu di u regimente, tutti i Corsi mubilizati partenu d’Aiacciu u 3 d’aostu. Ghjunghjenu in Massiglia da induve partenu versu u nordu in trenu. I Zitelli si ritrovanu cusì in Dieuze u 19 d’aostu è cummencia allora u so casticu.

Participeghjanu à a battaglia di a Marne da nuvembre 1914 à Ferraghju 1915. Sì muveranu quistannu à Les Eparges pò la Grurie. Si ritrovanu torna à a battaglia di Champagne da dicembre 1915 à Maghju 1916, pò in Verdun da Maghju 1916 à ottobre 1917. Infine seranu dinù in prima linea di a battaglia di Lorraine da Ottobre 1917 à Ghjugnu 1918.

A piazza di i Corsi

A particularità di i Corsi ingagiati inde issa guerra era forse ch’elli parlavanu pocu u francese. Ci vole à sapè chì l’aministrazione si face in francese in Corsica chè à partesi di a metà XIX^esimu seculu è chì tandu ùn hè parlatu solu chè in scola à l’epica. Ancu s’è e dispusizione annant’à e lingue dette regiunale eranu assai dure, Corsi chì parlavanu perfettamente u francese eranu pochi. Forse era di più difficiule per elli di capisce l’ordini è parechji sò stati fucilati per insuburdinazione o ancu solu pè l’esmpiu. Malgratu tuttu u 173^esimu hè statu vantatu parechje volte per e so azzione annant’à u terreniu.

À spessu u bilanciu per a Corsica hè tremende. E sorge⁴ e più credibule parlanu di 10 à 15000 Corsi morti annant’à tutti i mubilizati senza contà i smariti. Per l’opera Autonomia si tratterebbe di 40000 Corsi, allora chì René Sedillot parla à spessu di 12000 morti. E risorse sò parechje ma si pare cascà inde a issa furcina di 10 à 15000. I Zitelli sò à spessu decimati parechje volte è u bilanciu hè di 3500 suldati morti purtendu i culori di 173^esimu. U regimente hè statu rialzatu parechje volte cù a so riserva di u 373^esimu regimente d’infanteria chì avia e so base in Bastia, Aiacciu è Bunifaziu.

Eccu per issu secondu articulu di e digressione di u Lurianacciu appena più duru è seriu chè l’altri. Pensu ghjustapuntu chì st’esempiu (chì ùn hè micca u solu inde a storia di a “Grande Guerre”) ci tocca particularamente è chì diventa un divere⁵ di ricurdassine. À spessu truverete un picculu lessicu di e parole difficiule è ci ritruvemu per a settimana prossima ! Scialatevila !

Lessicu :

• 1 : Insulaire
• 2: Archiduc
• 3: Surnom
• 4: source
• 5: devoir